Suala la ligi kuejea limeshabainishwa na Rais wa nchi Dk John Magufuli, kinachosubiriwa ni Serikali kutoa ruhusa baada ya kujiridhisha na mwenendo wa ugonjwa wa corona nchini
Lakini pia imeelezwa ligi itakaporejea mashabiki hawataruhusiwa kuingia viwanja, kwa maana mechi zote 90 zilizobaki zitachezwa bila ya mashabiki
Mjadala uliopo ni kuhusu utaratibu gani utumike kukamilisha mechi zilizobaki kutokana na mazingira yaliyopo
Ipo hoja kuwa timu nyingi zimeathirika kiuchumi kutokana na janga la corona hivyo utaratibu wa mechi kupigwa nyumbani na ugenini huenda ukasababisha changamoto zaidi kwa timu
Hapa pia suala la mechi kupigwa bila ya mashabiki na wakati timu nyingi hutegemea zaidi mapato ya milangoni, linaongeza hofu kwa vilabu kuwa huenda vikashindwa kumudu gharama kama ikitokea havitapewa msaada wa kifedha
Hivyo yapo mapendekezo ya baadhi ya wadau waliowengi ambao wanadhani ni vyema ligi ikachezwa katika kanda au kuchagua viwanja vichache ambavyo mechi zote zitapigwa
Mfumo huu unaweza pia kusaidia udhibiti wa wahusika wa timu zote kwani ikumbukwe kutakuwa na vipimo vya corona kabla ya mchezo wowote kuruhusiwa kupigwa
Lakini wapo wanaodhani utaratibu wa kawaida uendelee kutumika. Msemaji wa klabu ya Ruvu Shooting Massau Bwire alikwenda mbali zaidi kwa kusema ni bora ligi ikafutwa kama kutakuwa na ulazima wa kubadili mfumo wa kucheza mechi zilizobaki
Amesema kila timu inastahili kupewa haki yake, kubadili utaratibu wa mechi wakati huu utazinyima haki baadhi ya timu ambazo hazitakuwa na nafasi ya kutumia viwanja vyao vya nyumbani
Je tunamaliza vipi ligi?
