Mshambuliaji wa pembeni wa timu ya Difaa Al Jadid ya Morocco, Mtanzania Simon Msuva, amesema mafanikio yake katika soka yalichangiwa kwa kiasi kikubwa na kocha wa zamani wa Yanga, raia wa Uholanzi Hans Pluijm.
Msuva alisajiliwa katika klabu ya Difaa Al Jadid msimu wa 2017, akitokea Yanga baada ya kuonesha kiwango cha hali ya juu cha soka.
Msuva amemtaja Pluijm kama kocha aliyekuwa akimpa matumaini ya kufikia malengo yake katika soka la kimataifa
"Pluijm kwangu ni kocha wangu bora muda wote. Kuna wakati nilizomewa na mashabiki hata kunitupiwa chupa za maji uwanjani, lakini alikuwa ananiita na kunitaka machungu niliyokuwa nayapata wakati ule yawe chachu ya kujituma mazoezini na kutokata tamaa," Msuva amenukuliwa na gazeti la Bingwa
"Hata wakati napata dili la kuja Morocco Pluijm ndiye aliyenishauri kutoikataa hii ofa na kunitaka nipambane, kwani ni njia ya kupata mafanikio"
Msuva anabaki kuwa miongoni mwa wachezaji walioipa Yanga heshima akishiriki katika kikosi kilichotwaa mataji matatau mfululizo kuanzia mwaka 2014
Mpaka leo Yanga bado inatafuta mchezaji sahihi wa kuziba nafasi yake kwani tangu alipoondoka pengo lake limebakia
