Kocha Mkuu wa Yanga Luc Eymael amesema mchezo wa nusu fainali ya kombe la FA dhidi ya Simba ambao utapigwa keshokutwa Jumapili, ni wa kufa au kupona
Baada ya kukosa ubingwa wa ligi kuu, Eymael amesema ubingwa wa kombe la FA ndio utawapatia nafasi ya kushiriki michuano ya Kimataifa msimu ujao, hivyo hawana namna zaidi ya kushinda mchezo huo
Mbelgiji huyo amesema wanafahamu mchezo hautakuwa mwepesi kwa sababu unahusisha vilabu vyenye upinzani wa jadi, lakini pia matokeo ya ushindi ambao Yanga waliyapa kwenye mchezo uliopita baina yao, unawafanya Simba wakamie mchezo huo wakitaka kulipa kisasi
"Hii mechi itakuwa ngumu sana, kwa sababu Simba wanataka kulipa kisasi kwani tuliwafunga mchezo uliopita wa Ligi Kuu Tanzania Bara, lakini wote tunataka kuingia fainali na kutwaa ubingwa huu,” alisema.
"Sisi mchezo huu una umuhimu mkubwa sana kwetu, kwani inaweza ikawa njia ya kushiriki michuano ya kimataifa, na tumejiandaa tunamaliza kazi mapema," alisema Eymael
Baada ya ushindi dhidi ya Kagera Sugar kule Bukoba, Yanga iliendelea kubaki mkoani humo ikijiandaa na mchezo huo, kikosi kikitarajiw akurejea jijini Dar es salaam leo kwa ajili ya kukamilisha maandalizi ya mwisho
