Siku ya kesho Jumapili, kikosi cha Yanga kitashuka katika uwanja wa Taifa kumenyana na watani zao Simba katika mchezo muhimu wa nusu fainali michuano ya kombe la FA (ASFC)
Yanga inasaka nafasi ya kutinga fainali ya michuano hiyo ambayo itapigwa kule mkoani Rukwa, katika uwanja wa Nelson Mandela
Kocha Luc Eymael atakuwa na kazi ya kuchagua wanaume 11 ambao watapewa jukumu la kuhakikisha wanaipeleka Yanga fainali
Ukimuondoka Mapinduzi Balama, nyota wengine wa kikosi cha kwanza wako tayari kwa mchezo huo
Siku mbili nyuma kulikuwa na wasiwasi juu ya hatma ya kiungo Haruna Niyonzima na nahodha Msaidizi Juma Abdul ambao walipata majeraha kwenye mchezo wa ligi dhidi ya Biashara United
Jana Eymael alibainisha kuwa wachezaji hao walifanya mazoezi na wenzao vizuri hivyo wana zaidi ya asilimia 50 kushiriki mchezo huo
Bila shaka, langoni Eymael ataendelea kumuamini Metacha Mnata licha ya Farouk Shikhalo kufanya vizuri katika michezo ya karibuni
Abdul anaweza kurejea upande wa kulia kama madaktari watajiridhisha na hali yake lakini hata akikosekana nafasi hiyo anaweza kuwekwa Deus Kaseke ambaye ameonyesha kuimudu vyema
Jaffar Mohammed ndiye anayeangaliwa zaidi upande wa ulinzi wa kushoto wakati pale kati wababe Lamine Moro na Said Juma Makapu watasimama wawili kuwadhibiti washambuliaji wa Simba
Kama Tshishimbi hatakuwa vizuri, nafasi ya kiungo mkabaji huenda akakaa mkongwe Kelvin Yondani au Abdulaziz Makame 'Bui' kutegemeana na mbinu ambayo Eymael ataingia nayo
Hakuna shaka Kaseke anastahili kuwa na nafasi kwenye kikosi kitakachoanza hapo kesho, winga ya kulia anaweza kuonekana wakati mwenye mkuki wa sumu, Bernard Morrison atatokea winga ya kushoto
Huu unaweza kuwa mchezo wa kwanza wa dabi kwa mshambuiliaji David Molinga 'Falcao' kama Eymael ataamua kuanza nae.
Lakini pia kasi na nguvu za Ditram Nchimbi zinaweza kuhitajika kuwapa wakati mgumu walinzi wa Simba ili kumrahisishia kazi Morrison
Fundi Niyonzima anaweza kuwepo pale kati akishirikiana na Feisal Salum 'Fei Toto' kuhakikisha ushindi unapatikana. Lakini nje atakuwepo Mohammed Issa 'Banka' ambaye alijumuishwa kwenye kikosi cha wachezaji 26 walioingia kambini kujiwinda na mchezo huo
Hii ni mechi ya kufa au kupona kwa Yanga, hakuna matokeo mengine zaidi ya ushindi. Kwani hatma ya ushiriki wa michuano ya Kimataifa msimu ujao, imeshikiliwa na mchezo huu
