Tetesi zimekuwa nyingi sana wakati siku moja tu ikiwa imesalia kabla ya msimu wa ligi kuu ya Vodacom kufika tamati na timu kuanza maandalizi ya msimu ujao
Hans van Pluijm ndio kocha wa mwisho kuipa Yanga ubingwa wa ligi kuu, msimu wake wa mwisho nusu ya kazi yake ilimaliziwa na George Lwandamina, raia wa Zambia
Ndiye aliyeunda kikosi kilichotwaa ubingwa wa ligi kuu kwa misimu mitatu mfululizo
Katika misimu miwili na nusu aliyokuwa na mabingwa hao wa kihistoria, alijizolea sifa kwa kuunda timu iliyokuwa ikitandaza soka maridadi
Wakati wake aliwasajili nyota wengi waliotamba Yanga wakiongozwa na Donald Ngoma, Thabani Kamusoko na Obrey Chirwa lakini pia alikuwa chachu ya kuwaibua akina Yusufu Mhilu, Juma Mahadhi bila kumsahau Simon Msuva ambaye aliweza kumfanya awe mchezaji wa kutegemewa kwenye kikosi cha kwanza
Za chinichini ni kwamba huenda 'Babu' Pluijm anaweza kurejea Jangwani, mabosi wa Yanga wakifikiria mpango wa kuvunja benchi lote la ufundi
Mbelgiji Luc Eymael anaweza kuponzwa na mwenendo wa kusuasua wa kikosi chake akiweka rekodi ya kupata sare 15 licha ya kuwa suala la uimara wa kikosi linaweza kuwa limechangia
Je Pluijm anaweza kuirejesha Yanga katika zama zile za kampa-kamtena, kapigwa-kapigwa tena...?
