Jana mashabiki wa Yanga hawakuwa na furaha pale walipoona kikosi kinachoanza hakina wachezaji nyota Wacongomani Tuisila Kisinda na Mukoko Tonombe
Hata hivyo imefahamika kuchelewa kwa ITC za nyota hao ndio sababu iliyopelekea wasiwe sehemu ya kikosi kilichoanza kwa kuwa hawakuwa kwenye mpango wa mchezo huo
Wakati Yanga ikijiandaa na mchezo dhidi ya Prisons, ITC za nyota hao hazikuwa zimefika hivyo kwa kiasi kikubwa benchi la ufundi hawakuwa na uhakika kama wangeweza kuwatumia na kupelekea waondolewe kwenye mpango wa mchezo huo
Lakini saa chache kabla ya kuivaa Prisons, Yanga ikapokea ITC zao na wakati huo tayari kocha Zlatko Krmpotic ameshaiandaa timu yake kwa ajili ya mchezo huo uliomalizika kwa matokeo ya sare ya bao 1-1
Bila shaka Mukoko na Tuisila watakuwa sehemu ya kikosi kitakachoivaa Mbeya City Jumapili ijayo baada ya changamoto hiyo kumalizika
Katika dakika chache walizocheza kwenye mchezo wa jana, Tuisila na Mukoko walionyesha umuhimu wao, Kisinda akipoteza nafasi kadhaa za kufunga huku Mukoko akibadili taswira ya mchezo kwa pasi zake ndefu
