Keshokutwa Jumamosi mabingwa wa kihistoria Yanga watashuka uwanja wa Kaitaba kumenyana na Kagera Sugar katika mchezo wa ligi kuu ya Vodacom, raundi ya tatu
Huu ni mchezo utakaokuwa na sura tatu tofauti;
Kwanza ni mchezo mwanzo ambao Yanga itacheza nje ya jiji la Dar es salaam tangu kuanza kwa msimu huu
Yanga ilicheza mechi zake mbili za awali jijini Dar es salaam ikilazimishwa sare dhidi ya Tanzania Prisons na baadae kuifunga Mbeya City
Pili katika mchezo huu, kiungo Zawadi Mauya anatarajiwa kuwakabili waajiri wake wa zamani Kagera Sugar
Mauya alisajiliwa na Yanga akitokea klabu hiyo inayonolewa na Meckie Mexime
Upo uwezekano mkubwa Mauya ataanza sambamba na Mcongomani Mukoko Tonombe katika safu ya kiungo
Mauya na Mukoko walionekana kuelewana sana kwenye mchezo wa kirafiki dhidi ya Mlandege Fc ambao ulipigwa jana uwanja wa Azam Complex na Yanga kushinda mabao 2-0
Lakini pia, huu utakuwa mchezo wa kwanza ugenini kwa kocha Krmpotic. Hiki ni kipimo chake cha kwanza juu ya mbinu ambazo anapaswa kuzitumia kwenye michezo ya ugenini
Kutakuwa na ahueni sababu uwanja wa Kaitaba ni wa nyasi bandia, anaweza kutumia falsafa yake ya kuweka mpira chini
Lakini atakapokwenda mkoani Morogoro kuifuata Mtibwa Sugar pengine atalazimika kubadili mbinu kutokana na mazingira mabovu ya uwanja wa Jamhuri
