Kiwango cha juu kinachoonyeshwa na beki kisiki wa Yanga Bakari Nondo Mwamnyeto, kimemuibua Mwenyekiti wa Coastal Union Steven Mguto akitamba kuwa wameiuzia Yanga jembe la kazi
Mwamnyeto alitua Yanga dirisha la usajili lililopita akitoka klabu ya Coastal Union ikielezwa GSM wametoa kitita cha zaidi ya Tsh Milioni 120 kumnyakua kutoka kwa wagosi hao wa kaya
Ikumbukwe beki huyo pia alikuwa aliwaniwa na klabu ya Simba iliyozidiwa ujanja na Injinia Hersi Said ambaye alifanikisha usajili huo kibabe
Mguto amesema anaamini wadau wa soka nchini sasa wanaweza kuelewa kwa nini hawakuwa tayari kumuachia Mwamnyeto kwa dau la chini
"Watu walikuwa wanaona kama tunatania wakati tunasema huyu ndiye beki ghali zaidi nchini. Tulikiona kipaji chake, tunaendelea kumfuatilia na kumpa hamasa ili aweze kufanya vizuri zaidi"
"Mmeona alivyo na ubora wa kukabiliana na mpira ya juu sio rahisi mpira wa krosi upite juu yake. Ni mchezaji wenye utulivu wa hali ya juu hata kwa mipira ya chini"
"Tumewapatia Yanga beki mzuri, lakini pia wachezaji aliokutana nao pale Yanga nao ni wazuri. Nadhani Yanga msimu ujao kama watapata nafasi ya kushiriki michuano ya Kimataifa watakuwa na timu imara sana," alisema Mguto
Mwamnyeto ametua na kuingia moja kwa moja kwenye kikosi cha kwanza cha Yanga. Yeye na Lamine Moro wametengeneza pacha bora ya ulinzi ambayo wengi wanaitizama kuwa namba moja mpaka sasa
