Mkuu wa Kitengo cha Habari na Mawasiliano klabu ya Yanga Hassan Bumbuli ameitaka klabu ya Simba iwakemee mashabiki wake kuwa wanapokwenda uwanjani kutazama mechi za Yanga waache kutumia maneno ya kejeli na kashfa kwa mashabiki wa Yanga
Aidha Bumbuli amesema hata viongozi wa timu zote wanapaswa kuacha tabia ya kuwakejeli, kuwatukana na kuwadhalilisha watu kwani mambo hayo yanaweza kuwa sababu ya chuki inayojengeka miongoni mwa mashabiki
Pamoja na kutounga mkono kitendo kilichofanywa na mashabiki wa Yanga mkoani Morogoro Bumbuli amesema ni vyema mambo haya yakaangaliwa kwa upana zaidi na kujua yanasababishwa na nini sasa kwani zamani hayakuwepo
"Simba inapaswa ikemee mashabiki wake kuwa wanapaswa kuwa wastaarabu pale wanapokwenda kutizama mechi za Yanga. Wasiingie uwanjani kwa lengo la kuwakera na kuwakejeli mashabiki wa Yanga, kejeli siku zote hazivumuliki"
"Lakini hata sisi viongozi wa hivi vilabu, tupunguze kutukana, kudhalilisha na kukera watu. Jambo hili linapandikiza chuki kwa mashabiki," alisema Bumbuli
"Unakuta shabiki wa Simba anatamba kuwa anakwenda uwanjani kuangalia mechi za Yanga kwa lengo la kuhakikisha Yanga inafungwa, hili ni jambo la hatari kwa sababu hata mtu anapokuja nyumbani kwako na kukuambia atahakikisha hulali vizuri na familia yako huwezi kumchukulia vizuri"
Jana klabu ya Yanga ililaani matukio ya vurugu viwanjani wakilitaka Jeshi la Polisi kuchukua hatua stahiki kwa wote waliohusika. TFF, Bodi ya Ligi nao walilaani matukio hayo
Ni wazi jambo hili linaweza kutatuliwa pale mashabiki watakapokuwa tayari kulinda misingi ya Amani kwa kutofanya matukio yanayoweza kuamsha hisia za watu wengine
