Ukweli ni kuwa Wanayanga walio wengi wamepoteza imani na uongozi wa Rais wa TFF Wallace Karia kutokana na kile kinachoonekana klabu yao kutotendewa haki katika masuala mengi ndani ya uongozi wake
Ni bahati mbaya sana jambo hili limeanza kuwa na athari hata kwa timu ya Taifa. Mwamko wa Wanayanga kuiunga mkono timu ya Taifa unazidi kwenda chini
Leo imeundwa Kamati ya ushindi Stars ikiwajumuisha Rais wa GSM Ghalib Said Mohammed akiwa Mwenyekiti huku Injinia Hersi Said akiwa Katibu Mkuu
Kamati hiyo ni kama inatumika 'kuwalainisha' mashabiki wa Yanga waweke silaha chini, waiunge mkono timu yao ya Taifa kupitia viongozi wao wanaowaheshimu sana
Kazi iliyofanywa na GSM ndani ya Yanga inafahamika, Ghalib na Injinia Hersi wamejijengea heshima ya kipekee miongoni mwa mashabiki wa Yanga
Lakini hoja ya msingi hapa ni kwa nini tumefika hapa? kwani timu ya Taifa ni ya Watanzania wote, katika hali ya kawaida mwananchi hahitaji hamasa ili kuiunge mkono timu yake ya Taifa. Ukiona tumefika hapa basi fahamu kuna tatizo mahali
Sawa, kuundwa kwa Kamati ni jambo jema kwani itawahamasisha mashabiki, lakini muhimu zaidi ni kwa TFF kuhakikisha inarekebisha yale mapungufu yanayopelekea baadhi ya mashabiki wasione fahari kuiunga mkono timu yao
