Leo Yanga itakamilisha maandalizi yake ya mwisho kuelekea mchezo wa ligi kuu dhidi ya Gwambina Fc ambao utapigwa kule Misungwi dimba la Gwambina
Baada ya ushindi wa mechi saba mfululizo, mabingwa hao wa kihistoria wamepania kushinda ugenini dhidi ya Gwambina mchezo huo ukiwa sehemu ya maandalizi kuelekea mchezo dhidi ya watani zao Simba ambao utapigwa wiki ijayo
Pamoja na ugumu wa ratiba ambapo Yanga wamepumzika siku mbili tu baada ya mchezo dhidi ya Biashara United, kocha Cedric Kaze amesema wamejipanga kuwapa furaha mashabiki kwa kuondoka na alama zote tatu
Kaze amekuwa na mwanzo mzuri katika kikosi cha Yanga akishinda michezo yote mitatu iliyochezwa mikononi mwake
Chini yake, Yanga imeanza kuonyesha utofauti wa kiuchezaji, kandanda safi linaonekana licha ya kuwa bado ipo changamoto katika safu ya ushambuliaji kutokana na idadi ya mabao yanayofungwa
Kaze amesema kwa sasa wanachohitaji ni ushindi tu bila ya kujali idadi ya mabao wanayofunga kwani mabao mengi yatamiminika pale timu itakapokuwa imeiva sawasawa
