Mkurugenzi wa Uwekezaji GSM Mhandisi Hersi Said amewahamasisha Watanzania kujitokeza kwa wingi kuiunga mkono timu ya Taifa ya Tanzania 'Taifa Stars' katika mchezo wa kuwania kufuzu fainali za Afcon 2021 dhidi ya Tunisia
Hersi ambaye ni Katibu wa Kamati ya saidia Stars ishinde, amesema timu ya Taifa ni mali ya Watanzania wote hivyo kuelekea mchezo huo hatupaswi kuwa na matabaka
"Tuache kuweka matabaka yasiyokuwa na tija, tuzipende timu zetu lakini tutambue kuwa zote hizo Mzazi wake ni Tanzania"
"Inapokuwa inacheza Stars inamaanisha ni suala la nchi sio timu hizi mbili pekee, kwahiyo mashabiki wa Yanga na Simba wajitokeze uwanjani na washangilie bila kuwepo matabaka," amesema Hersi
Kesho Jumanne, Stars itakuwa na shughuli pevu mbele ya Tunisia katika mchezo wa kuwania tiketi ya kufuzu fainali za michuano ya Afcon 2021
Baada ya kupoteza mechi mbili zilizopita, Stars inapaswa kupata ushindi ili kuweka hai matumaini ya kufuzu kwa michuano hiyo
Guinea ya Ikweta, Libya na Tanzania zote zina alama tatu hivyo kila moja ina nafasi ya kufuzu kama itafanya vizuri katika mechi zilizobaki
Tanzania itacheza mechi mbili nyumbani dhidi ya Libya na Tunisia na baadae kuifuata Guinea ya Ikweta
