Feisal Salum 'Fei Toto' ameisaidia Tanzania kupata alama moja muhimu baada ya kulazimishwa sare ya bao 1-1 dhidi ya Tunisia katika mchezo wa kusaka tiketi ya kutinga fainali za michuano ya Afcon 2021
Fei Toto alifunga bao hilo kwenye dakika ya 48 akiachia fataki nje ya 18 baada ya kutengewa pasi na John Bocco
Kiungo huyo fundi aliingia kwenye dakika ya 34 kuchukua nafasi ya Himid Mao ambaye hakuwa na mchezo mzuri leo
Hata hivyo ni Tunisia waliokuwa bora kwa muda wote wa mchezo wakipeleka mashambulizi langoni kwa Stars
Walitangulia kufunga bao kwenye dakika ya 11 kupitia kwa Seif Eddine Khoul
Ni matokeo yanayowanufaisha zaidi Tunisia ambao kimahesabu wanaweza kuwa wamejikatia tiketi mapema kushiriki michuano hiyo itakayofanyika Cameroon mwakani
Stars imesogea hadi nafasi ya pili baada ya kufikisha alama nne hata hivyo matokeo ya mchezo kati ya Guinea ya Ikweta dhidi ya Libya yanaweza kubadili msimamo hapo kesho
