Kauli ya msemaji wa klabu ya Simba Haji Manara kuwakataza mashabiki wa soka wasiokuwa wa klabu yake kuhudhuria mchezo wa ligi ya mabingwa mwishoni mwa wiki watakayocheza dhidi ya Plateau United, haipendezi na inaweza kusababisha madhara
Kwa miaka mingi vilabu vya Yanga na Simba vimekuwa na utamaduni ambao kwa kiasi kikubwa ndio unaonogesha upinzani uliopo
Kwa Tanzania haitatokea mashabiki wa Yanga wakaiunga mkono klabu ya Simba katika mashindano yoyote, iko hivyo hata kwa upande wa Simba
Suala la mashabiki wa timu moja kuingia uwanjani kuwashangilia timu pinzani kwa mechi zinazozihusu Yanga na Simba, ni kawaida kabisa
Sio jambo lililoanza leo, imekuwa hivyo kwa miaka mingi na huko nyuma hakukuwahi kutokea tatizo lolote
Sasa inapofika wakati kiongozi wa timu moja anajitokeza hadharani anatangaza kuwa kwenye mchezo wetu hatuwataki mashabiki wa timu nyingine ni jambo ambalo linaweza kuwa gumu kutekelezeka
Hivi itakuwaje kama Yanga na timu nyingine nazo zikitangaza kuwa hawawataki mashabiki wa Simba kwenye mechi zao? hatuoni kama tunapoelekea tunaenda kutengeneza uhasama?
Ni bahati mbaya sana kipindi hiki baadhi ya viongozi wa mpira kwa makusudi kabisa wanaamua kutupeleka mashabiki sehemu ambayo hatupaswi kwenda
Naamini tamko la Manara alilitoa yeye kama yeye na hakutumwa na Taasisi anayoifanyia kazi
Kwani itakuwa aibu kwa Taasisi kubwa kama Simba inayojitamba kuendeshwa kisasa zaidi kuliko wengine nchini kufanya kile kilichozungumzwa na Manara
