Kiungo mshambuliaji wa Yanga Saido Ntibazonkiza ameeleza kufarijika na mapokezi aliyopewa na Wananchi juzi baada ya kutua akitokea kwao Burundi
Aidha nyota huyo aliyejijengea heshima ya kipee katika soka la Burundi, amesema atahakikisha mchango wake unaisaidia Yanga kutimiza malengo ya kushinda ubingwa
Amebainisha kuwa wakati yuko kwao akisubiri kujiunga na Yanga, alikuwa akifuatilia ligi kuu na anaamini Yanga imestahili kuwa kileleni mwa msimamo wa ligi kwani wana kikosi imara zaidi kulinganisha na timu nyingine
"Asante mashabiki wa Yanga kwa mapokezi makubwa. Najua nina deni kubwa hapa, naahidi nitawapa furaha tukishirikiana na wachezaji wenzangu wa Yanga," alisema
"Nimekuwa naangalia kweli mechi za timu mbalimbali wakati nikiwa nyumbani, naona Yanga ni timu bora ambayo inastahili kuwa juu ya msimamo, hatua hii ya kuongoza ligi ni kitu kikubwa nafasi yangu sasa ni kutumia uzoefu wangu kuongeza kitu nikishirikiana na wenzangu katika kuipa mafanikio timu yangu mpya," alisema
Ntibazonkiza alianza kujifua na kikosi cha Yanga jana Alhamisi, akitarajiwa kuanza kuonekana akiwatumikia mabingwa hao wa kihistoria baada ya kufunguliwa kwa dirisha dogo la usajili Disemba 15
