Kiungo mshambuliaji wa Yanga Saido Ntibazonkiza 'Antibiotic' amesema ni faraja kwake akiwa mchezaji wa Yanga kushinda taji lake la kwanza na kikosi cha mabingwa hao wa kihistoria
Nyota huyo wa Kimataifa kutoka Burundi, amewaahidi mashabiki wa Yanga kuwa watarajie mambo mazuri zaidi kutoka kwake
Ntibazonkiza alikuwa sehemu ya kikosi kilichotwaa ubingwa wa kombe la Mapinduzi kwa kuifunga Simba mikwaju ya penati 4-3 baada ya matokeo ya suluhu ya bila kufungana
Saido alicheza mchezo huo kwa dakika zote 90 na ndiye aliyefunga penati ya mwisho iliyoihakikishia Yanga ubingwa
Mwenyewe amesema alishiriki michuano hiyo akiwa hayuko fiti kwa asilimia 100 lakini kwa heshima ya wachezaji wenzake, viongozi na mashabiki aliamua kuwa sehemu ya kikosi kilichocheza fainali licha ya kuwa hakuwa amefanya mazoezi na timu kwa wiki tatu kutokana na majeraha
Tangu atue Yanga mwezi uliopita, Ntibazonkiza ameonyesha kiwango kikubwa. Nyota huyo aliibuka na tuzo ya mchezaji bora wa VPL mwezi Desemba, ameichezea Yanga michezo mitano na kuhusika kwenye mabao saba akifunga mabao manne na kuasisti mara tatu.
"Nafurahi kwa kufanikiwa kushinda taji langu la kwanza nikiwa na kikosi cha klabu ya Yanga, haya ni mafanikio makubwa kama mchezaji kwa kuwa kila mchezaji mkubwa anahitaji kuthibitisha uwezo wake kwa kupata mafanikio hususani kushinda mataji.
"Mimi siyo muongeaji sana, bali napenda kuonyesha uwezo wangu uwanjani na watu wanijaji kutokea huko, tumeanza na Mapinduzi na sasa mawazo yetu ni kuelekea kwenye mashindano mengine tutakayoshiriki," alisema
