Nyota wa Yanga wameapa kupambana kuhakikisha wanashinda mchezo wa ligi kuu dhidi ya Mbeya City kuendelea kuweka hai malengo ya kutwaa ubingwa msimu huu
Ni misimu mitatu sasa imepita tangu Wanayanga washangilie ubingwa wa ligi kuu
Aidha kwa wachezaji ubingwa ndio kipaumbele cha kwanza. Ili kufanikisha hilo, Yanga inapaswa kushinda kila mchezo unaokuja mbele yake
Lengo ni kukusanya alama nyingi ambazo hesabu yake inaweza kutimia mwishoni mwa msimu na Wananchi kurejea katika utamaduni wao wa kubeba makombe
Kiungo fundi wa mabingwa hao wa kihistoria Feisal Salum 'Fei Toto' amesema wamesafiri mkoani Mbeya kuzipigania alama tatu, lengo lao ni kuhakikisha wanalifanikisha hilo
"Tunachofikiria sisi ni kupata matokeo mazuri dhidi ya Mbeya City. Kama timu tuna malengo na tutapambana ili tufanikiwe. Tunawaomba mashabiki wetu watuunge mkono na wasisahau kutuombea dua ili tufanikiwe," alisema
Naye mlinzi wa kulia wa Yanga Kibwana Shomari amesema wanafahamu mchezo dhidi ya Mbeya City hautakuwa mwepesi kama ilivyo mechi zote wanazocheza haziwi nyepesi lakini lengo lao ni kuondoka na ushindi
"Pamoja na ushindani uliopo, msimu huu malengo yetu ni ubingwa, hivyo ni lazima tuweze kukusanya pointi nyingi ikiwemo katika mchezo wetu unaofuata dhidi ya Mbeya City, tutapambana kufanikisha hilo"
Yanga wako mkoani Mbeya tangu jana, leo wakitarajiwa kukamilisha maandalizi ya mwisho katika uwanja wa Sokoine
