Baada ya mapumziko ya michuano ya CHAN, vinara wa ligi kuu ya Vodacom Yanga leo wanarejea 'mzigoni' wakianzia kule mkoani Mbeya kwa mchezo dhidi ya Mbeya City
Ni mchezo unaotarajiwa kuwa na upinzani mkali. Mbeya City wamekuwa bora sana kila wanapocheza katika uwanja wa Sokoine
Hata hivyo, msimu huu Yanga tayari wamecheza katika uwanja huo dhidi ya Ihefu Fc na wakafanikiwa kuondoka na ushindi wa mabao 3-0
Timu hizi zilipokutana kule jijini Dar es salaam, Wananchi walilazimika kusubiri mpaka dakika ya 87 kushangilia bao la Lamine Moro ambalo liliwahakikishia alama tatu muhimu
Kila kona ya mji wa Mbeya utashuhudia shamrashamra za mashabiki wa Yanga ambao wanaamini timu yao leo itaendeleza wimbi la ushindi lengo likiwa kufanikisha kutwaa ubingwa msimu huu
Katika mchezo huo Yanga itamkosa nyota wake muhimu Saido Ntibazonkiza ambaye amebaki jijini Dar es salaam akisumbuliwa na matatizo ya misuli
Aidha kocha Cedric Kaze pia amethibitisha kuwa mshambuliaji Yacouba Songne na beki Dickson Job watakosekana kwa kuwa hawako fiti
Hata hivyo fundi raia wa Angola Carlinhos yeye anarejea baada ya kukosekana kwa muda mrefu
Ni mchezo ambao hesabu za Wananchi wamezielekeza katika kukusanya alama zote tatu
Lakini wanatarajiwa kukumbana na upinzani mkali kutoka kwa Mbeya City ambao wanapokuwa hapo Sokoine mara nyingi wanakuwa wagumu sana kufungwa na Yanga
