Mwenyekiti wa Yanga Dk Mshindo Msolla amewataka wapenzi, Wanachama na Mashabiki wa timu hiyo kuunga mkono juhudi za ukarabati wa Jengo la Makao Makuu lililoko Mtaa wa Twiga na Jangwani jijini Dar es salaam
Tawi la Yanga 'Elite' liliendesha zoezi la kupaka rangi jengo hilo lenye historia kubwa, Dk Msolla amewataka Wanayanga wengine waunge mkono juhudi hizo kwa kujitolea kufanya ukarabati katika maeneo mengine
Akizungumza na Wanahabari mapema leo, Dk Msolla amesema wanakusudia kulitumia jengo hilo kwa ajili ya kambi za timu ya Vijana na ile ya Wanawake 'Yanga Princess' hivyo wanahitaji kukarabati miundo mbinu ya jengo hilo ili liweze kutumika ipasavyo
"Ukarabati wa jengo la Yanga utafanywa na wanayanga wenyewe, tunafurahia kuna tawi moja (Elite) limejitokeza kupiga rangi jengo letu la Makao Makuu"
"Matawi mengine yaige kutoka kwa tawi la Elite kwani kinachofuata sasa ni kukarabati vyumba vya ndani na tunaamini wananchi ni wengi na kazi hiyo watafanya wenyewe"
"Yanga tuna timu nne, gharama za kuweka timu kambini kwa maana ya kulipia hoteli ni kubwa sana. Tukishakarabati jengo letu timu zetu za U17, U20 na Yanga Princess zitakuwa zinakaa kwenye jengo letu zinapokuwa na mashindano," amesema Dk Msolla
Gharama za kukarabati chumba kimoja katika jengo hilo zinafikia Tsh Milioni sita
Baadhi ya Wanachama tayari wamejitokeza kufanya ukarabati. Wanachama hao ni pmoja na Thobias Lingalangala, Injinia Hersi Said, martin Komba, Wanachama wa mkoani Geita, Arafat na Afisa Mhamasishaji Antonio Nugaz aliyeahidi kukarabati vyumba viwili
Vyumba vinavyohitaji ukarabati viko 30 lakini pia kuna Gym na kuweka vivutio ili jengo liwe na Hadhi
Kuhusu mradi wa Kigamboni, uongozi wa Yanga unatarajiwa kumtangaza mkandarasi wa mradi huo wiki ijayo
