Kocha wa zamani wa Yanga Mwinyi Zahera amemtaja mshambuliaji Michael Sarpong kuwa miongoni mwa wachezaji wazuri ambao klabu ya Yanga imewasajili
Zahera ametofautiana na wale wanaomponda mshambuliaji huyo anayekabiliwa na ukame wa mabao
Mcongoman huyo amesema anaamini benchi la ufundi la Yanga halijapata namna sahihi ya kumtumia mshambuliaji huyo ili aweze kuwa na faida
"Mimi kama ningekuwa Yanga ningeletewa Sarpong ningemsajili haraka sana, yule ni mshambuliaji hatari, watu hawajui kabisa ubora wake ndio maana wanalaumu," Zahera alinukuliwa na gazeti la Mwanaspoti
"Kuna namna ya kumfanya mshambuliaji wa aina ile awe anafunga, nadhani hapo ndipo penye tatizo. Benchi la ufundi ndilo lenye jukumu la kumjenga kupitia video zake za nyuma wanaweza kubaini mapungufu yake na kumsaidia kuanzia hapo"
"Sarpong ni mchezaji anayejituma sana uwanjani. Walinzi huhofia wachezaji aina yake. Angalia akiwa na mpira hakuna beki anayeweza kuwa na raha, kila wakati beki anaona yuko hatarini. Baada ya hapo ni kazi ya makocha kumjenga kimbinu ili aweze kuwa na madhara zaidi," alisema Zahera
Kocha Mkuu wa Yanga Cedric Kaze amewahi kunukuliwa akisema kuwa anaridhika na kazi anayoifanya Sarpong uwanjani licha ya kuwa wakati mwingine hafungi
Kaze alisema kazi ya mshambuliaji sio kufunga tu, pia anaweza kuwa msaada kwa wenzake kufunga
Sarpong amefunga mabao manne kwenye ligi msimu huu na kutoa pasi mbili za mabao
