Klabu ya Azam FC imethibitisha rasmi kurejea kwa kiungo mshambuliaji wa Ivory Coast, Zunon Kipré Emmanuel Junior maarufu kama Kipre Junior, baada ya kufikia makubaliano ya uhamisho na MC Alger ya Algeria. Nyota huyo amesaini mkataba na kutambulishwa rasmi katika makao makuu ya klabu, akirejea Chamazi baada ya kuondoka mwaka 2024.
Kipre alijiunga na MC Alger mwaka 2024 kwa dau lililoripotiwa kuzidi Shilingi milioni 700, ambapo aliisaidia klabu hiyo kutwaa mataji mawili ya Ligi Kuu ya Algeria pamoja na Kombe la Super la Algeria. Hata hivyo, baada ya misimu miwili nchini humo, pande zote mbili zilikubaliana kuvunja mkataba wake, hatua iliyofungua njia ya kurejea Azam FC.
Kwa mujibu wa makubaliano ya uhamisho huo, MC Alger itabaki na asilimia 30 ya ada ya mauzo ya baadaye endapo Azam FC itaamua kumuuza mchezaji huyo kwa klabu nyingine. Kurejea kwake kunatarajiwa kuimarisha safu ya ushambuliaji ya Azam FC kuelekea msimu wa 2026/27.
Katika kipindi chake cha kwanza akiwa Azam FC, Kipre Junior alicheza misimu miwili na kufunga mabao 12, akijijengea sifa kwa ubunifu, kasi na uwezo wake wa kutengeneza nafasi za mabao. Mashabiki wa Azam FC sasa wanatarajia kurejea kwake kutakuwa chachu ya mafanikio mapya huku klabu hiyo ikijiandaa kwa ushindani wa msimu mpya wa Ligi Kuu Tanzania Bara na mashindano mengine.
