Rais wa Shirikisho la Soka Barani Afrika (CAF), Dk. Patrice Motsepe, amesema ombi la Shirikisho la Soka la Misri (EFA) la kuongeza idadi ya vilabu vinavyoshiriki CAF Champions League bado halijafikiwa uamuzi. Amesisitiza kuwa mapendekezo hayo yatafanyiwa tathmini na vyombo husika vya CAF kabla ya hatua yoyote kuchukuliwa.
Akizungumza na waandishi wa habari, Motsepe alisema ombi hilo litawasilishwa kwa Katibu Mkuu wa CAF pamoja na Kamati Tendaji kwa ajili ya kupitia mapendekezo hayo kwa kuzingatia maslahi ya soka la Afrika. Kauli hiyo imekuja kufuatia pendekezo la Rais wa EFA, Hany Abo Rida, ambaye anataka kila shirikisho la taifa mwanachama lipate nafasi moja ya ziada katika mashindano ya CAF Champions League.
Iwapo pendekezo hilo litapitishwa, mataifa yenye ushindani mkubwa kama Misri, Morocco, Tunisia na Afrika Kusini yanatarajiwa kunufaika kwa kuongeza idadi ya wawakilishi wao katika mashindano hayo. Hata hivyo, taarifa zinaeleza kuwa Kamati ya Mashindano ya CAF ilipendekeza kulikataa ombi hilo kutokana na changamoto za ratiba, ingawa mjadala bado unaendelea ndani ya shirikisho hilo.
Ombi hilo limezua mjadala mkubwa barani Afrika, huku baadhi ya wadau wakiamini linaweza kuongeza ushindani wa mashindano hayo, wakati wengine wakihofia kuwa linaweza kuathiri usawa wa uwakilishi wa vilabu kutoka mataifa mengine. Endapo litapitishwa, klabu kama Al Ahly ya Misri zitakuwa miongoni mwa wanufaika wakubwa baada ya kukosa nafasi ya kushiriki CAF Champions League msimu huu kutokana na kumaliza nafasi ya tatu kwenye ligi yao.
